काठमाडौं । कुवेत प्रहरीले स्थानीयरूपमा उत्पादित विषाक्त मदिरा उत्पादन तथा वितरण गरेको आरोपमा ६७ जनालाई पक्राउ गरेको छ । विषाक्त मदिराको सेवनबाट २३ जनाको मृत्यु भएको छ । जसमा १६ जना नेपाली पनि छन् ।

कुवेतको गृह मन्त्रालयका अनुसार, विषाक्त मदिरा उत्पादन तथा बिक्रीमा एक बंगलादेशी नागरिकले नेतृत्व गरेका थिए ।

आवासीय र औद्योगिक क्षेत्रमा रहेका ६ वटा कारखाना र अन्य चारवटा सञ्चालनमा नआएका कारखाना पनि नियन्त्रणमा लिइएको मन्त्रालयले जनाएको छ ।

कसरी बनाइयो विषाक्त रक्सी ?

कुवेतमा मदिराको आयात वा स्थानीय उत्पादनमा प्रतिबन्ध छ । तर, अवैधरूपमा गोप्य स्थानमा उत्पादन गरिन्छ । यस्ता स्थानमा कुनै निरीक्षण वा सुरक्षा मापदण्ड हुँदैन ।

आपराधिक समूहमा संलग्न एक नेपालीले प्रहरीलाई मिथानोल कसरी तयार र बिक्री गरिन्छ भनेर जानकारी दिएका थिए ।

स्वास्थ्य मन्त्रालयका अनुसार, मिथानोल विषाक्तताका कारण १६० जना बिरामी भएकामध्ये २३ जनाको मृत्यु भएको छ । यीमध्ये अधिकांश एसियाली नागरिक छन् । कम्तीमा ५१ जनालाई तत्काल मिर्गौला डायलिसिसको आवश्यकता परेको थियो । अन्य ३१ जनालाई मेकानिकल भेन्टिलेसनको आवश्यकता परेको मन्त्रालयले जनाएको छ ।

कुवेतमा सबैभन्दा ठूलो आप्रवासी समुदाय रहेको भारतको दूतावासले पछिल्ला केही दिनमा करिब ४० भारतीय नागरिक अस्पताल भर्ना भएको जनाएको छ । यद्यपि कारण खुलाइएको छैन । दूतावासले एक्समा जारी विज्ञप्तिमा भनेको छ, “केहीको मृत्यु भएको छ, केहीको अवस्था गम्भीर छ भने अन्य बिरामीहरू निको हुँदै छन् ।”

• कुवेतमा विषाक्त मदिरा प्रकरण– दुई नेपालीसहित ६७ जना पक्राउ

मिथानोल एक विषालु, रंगहीन र गन्धरहित रक्सी हो । जुन औद्योगिक र घरायसी उत्पादनमा प्रयोग हुन्छ । यसलाई पत्ता लगाउन कठिन हुन्छ । यसको सेवनपछि लक्षणहरू सामान्यतया ढिलो देखिन्छन् । जसमा वाकवाकी लाग्ने, बान्ता हुने, पेट दुख्ने, अत्यधिक सास फेर्ने र श्वासप्रश्वासमा समस्या हुन्छ ।

डक्टर्स विदाउट बोर्डर्स (एमएसएफ)का अनुसार, हरेक वर्ष हजारौँ मानिसहरू, विशेषगरी एसियामा, मिथानोल विषाक्तताबाट प्रभावित हुन्छन् । उपचार नभएमा मृत्युदर सामान्यतया २० देखि ४० प्रतिशत हुने बताइन्छ ।