काठमाडौं, जुन ५ – अमेरिकी राष्ट्रपति डोनाल्ड ट्रम्पले विश्वका १२ देशका नागरिकहरूलाई अमेरिका यात्रा गर्न प्रतिबन्ध लगाउने निर्णय गरेका छन्। राष्ट्रपति ट्रम्पले यस सम्बन्धी घोषणापत्रमा हस्ताक्षर गरेपछि यो निर्णय औपचारिक रूपमा लागू गरिएको हो।

प्रतिबन्ध लगाइएका देशहरूमा अफगानिस्तान, म्यानमार, चाड, कंगो गणतन्त्र, इक्वेटोरियल गिनी, एरिट्रिया, हैटी, इरान, लिबिया, सोमालिया, सुडान र यमन रहेका छन्। साथै, बुरुन्डी, क्युबा, लाओस, सिएरा लियोन, टोगो, तुर्कमेनिस्तान र भेनेजुएलाका नागरिकहरूमाथि आंशिक रूपमा यात्रा प्रतिबन्ध लगाइएको छ।

यस निर्णयको औचित्य प्रस्तुत गर्दै ह्वाइट हाउसकी प्रवक्ता एबिगेल ज्याक्सनले भनिन्, “राष्ट्रपति ट्रम्पले अमेरिकी नागरिकको सुरक्षालाई प्राथमिकता दिँदै ती देशका नागरिकहरूबाट राष्ट्रिय सुरक्षामा खतरा हुन सक्ने आँकलनका आधारमा यो कदम चालेका हुन्।”

यो कदम राष्ट्रपति ट्रम्पको सन् २०१७ मा लिएको निर्णयसँग मिल्दोजुल्दो छ। पहिलो कार्यकालको सुरुवातमा उनले सात मुस्लिम बहुल देशहरूमाथि अमेरिका प्रवेशमा प्रतिबन्ध लगाएका थिए, जसले त्यसबेला निकै विवाद उत्पन्न गराएको थियो।

हालको निर्णय पनि ट्रम्प प्रशासनको आप्रवासन नीतिप्रतिको कडा र कठोर दृष्टिकोणको निरन्तरता भएको बताइएको छ। आलोचकहरूले यसलाई विभेदपूर्ण र मानव अधिकारविरोधी निर्णय भनेका छन् भने समर्थकहरूले यो कदमलाई अमेरिका भित्रको सुरक्षाका लागि आवश्यक कदमका रूपमा समर्थन गरेका छन्।

अमेरिकी राजनीतिमा ट्रम्पको यो निर्णय फेरि एकपटक आप्रवासन नीतिलाई केन्द्रमा ल्याएको छ, जसले आगामी निर्वाचनमा समेत प्रभाव पार्ने अपेक्षा गरिएको छ।