काठमाडौं । राष्ट्रिय विपद् जोखिम न्यूनीकरण तथा व्यवस्थापन प्राधिकरणले काठमाडौं उपत्यकासहित देशका प्रमुख सहरमा वायु प्रदूषण खतराको तहमा पुगेको जनाएको छ। बिहीबार (चैत २१) जारी विज्ञप्तिमा प्राधिकरणले वायु प्रदूषणको गम्भीरता बुझी सतर्कता अपनाउन सबैलाई आग्रह गरेको छ।

प्राधिकरणले नागरिकलाई सकेसम्म घरमै बस्न, घरबाटै काम गर्न, सवारीसाधनको प्रयोग कम गर्न, सरसफाइमा ध्यान दिन तथा अत्यधिक धुलो र धुवाँ उत्पन्न गर्ने गतिविधि रोक्न अनुरोध गरेको छ। साथै, बालबालिका, वृद्धवृद्धा तथा संवेदनशील स्वास्थ्य भएका व्यक्तिहरूको विशेष हेरचाह गर्न र बाहिर निस्कँदा सुरक्षित मास्कको प्रयोग गर्न सुझाव दिएको छ।

गर्मीसँगै डढेलो, आगलागी, निर्माण कार्यबाट निस्किने धुलो, सवारी प्रदूषण, फोहर व्यवस्थापनको अभाव तथा फोहर जलाउने कार्यले प्रदूषणको मात्रा बढेको बताइएको छ। काठमाडौं उपत्यकाको भौगोलिक संरचना, हिउँदे वर्षा कम हुनु र मनसुन सुरुआत नभएकाले वायु प्रदूषण थप भयावह बनेको प्राधिकरणले उल्लेख गरेको छ।

वायु गुणस्तर सूचकांक (AQI) अत्यन्त अस्वस्थकर बिन्दुमा पुगेकाले श्वासप्रश्वाससम्बन्धी समस्या, दम, फोक्सोको संक्रमण, सुक्खा खोकी, घाँटी चिलाउने, आँखा पोल्ने, छाला सुक्खा हुने, टाउको दुख्ने जस्ता स्वास्थ्य समस्याहरू बढ्न सक्ने चेतावनी दिइएको छ।

प्राधिकरणका अनुसार वायु प्रदूषणमा तत्काल सुधार नहुने देखिएको र अझै एक साता स्थिति उस्तै रहने अनुमान गरिएको छ। यसकारण, सम्बन्धित निकायलाई तत्काल प्रभावकारी उपाय अवलम्बन गर्न तथा संवेदनशील समूहलाई जोगाउन आवश्यक कदम चाल्न पनि अनुरोध गरिएको छ।