काठमाडौं । माध्यमिक शिक्षा परीक्षा (एसईई) आजदेखि देशभर सुरु भएको छ। बिहान ८ बजेदेखि देशभरका २,०८० परीक्षा केन्द्रमा परीक्षा सञ्चालन भएको छ।

परीक्षा नियन्त्रण कार्यालयका अनुसार यस वर्ष एसईई परीक्षामा २,५७,७३० छात्रा, २,५६,३११ छात्र तथा यौनिक तथा लैंगिक अल्पसंख्यक समुदायका ३० जना परीक्षार्थी सहभागी भएका छन्।

परीक्षामा सहभागी पाँच लाख १४ हजार ७१ परीक्षार्थीमध्ये १६ हजार ९४७ जना प्राविधिक समूहका रहेका छन्। परीक्षालाई मर्यादित र व्यवस्थित बनाउन केन्द्राध्यक्ष, सहायक केन्द्राध्यक्ष, निरीक्षक, सहायक, सहयोगी कर्मचारी तथा सुरक्षाकर्मीसमेत गरी ७७,८१७ जनशक्ति खटाइएको राष्ट्रिय परीक्षा बोर्डले जनाएको छ।

परीक्षा तालिकाअनुसार पहिलो दिन आज अनिवार्य अंग्रेजी विषयको परीक्षा सञ्चालन भइरहेको छ। संस्कृत वेदविद्याश्रमका विद्यार्थीहरूका लागि अनिवार्य संस्कृत तथा मदरसा तहका परीक्षार्थीका लागि अनिवार्य अरबी भाषाको परीक्षा रहेको छ।