डोनाल्ड ट्रम्पले अमेरिकाको ४७औं राष्ट्रपतिको रूपमा शपथ लिँदै दोस्रो कार्यकालको सुरुवात गरेका छन्। उनले आफ्नो पहिलो सम्बोधनमा "अमेरिकाको स्वर्ण युग" सुरु भएको घोषणा गर्दै देशलाई समृद्ध, सम्मानित, र सुरक्षित बनाउने वाचा गरे। ट्रम्पको पहिलो कार्यकाल विवादास्पद भए पनि यो कार्यकालमा उनले केही महत्त्वपूर्ण सुधार ल्याउने दाबी गरेका छन्।

उनको प्राथमिकता न्याय विभागको सुधार, राष्ट्रिय सुरक्षा, र अमेरिकाको सार्वभौमसत्ता बलियो बनाउनु हो। अमेरिकाको–मेक्सिको सीमामा राष्ट्रिय संकटकाल घोषणा गर्दै अवैध आप्रवासनलाई रोक्न कडा कदम चाल्ने घोषणा ट्रम्पको कट्टर आप्रवासन नीतिलाई पुनः पुष्टि गर्छ। लाखौं ‘अपराधी आप्रवासी’लाई फिर्ता पठाउने योजना पनि यही नीति अन्तर्गत रहेको छ।

तर, ट्रम्पको "अमेरिका प्रथम" नीति केवल भाषणमै सीमित रहने हो वा यसले विश्वमञ्चमा सकारात्मक प्रभाव पार्न सक्छ भन्नेमा अझै प्रश्नचिन्ह छ। उनको आक्रामक शैलीले अमेरिकाभित्र र बाहिर विभाजन निम्त्याएको अतीतलाई मध्यनजर गर्दा, यो कार्यकालमा उनी कस्तो कार्यसम्पादन गर्छन् भन्ने कुराले विश्व राजनीतिमा ठुलो प्रभाव पार्नेछ।

अमेरिकी जनतालाई समृद्ध र सुरक्षित बनाउने ट्रम्पको योजना कति व्यवहारिक छ? के उनका कदमले देशभित्र एकता ल्याउनेछन् वा थप विवाद र ध्रुवीकरणको बाटो खोल्नेछन्? यी प्रश्नहरूले उनको नेतृत्वको सफलता वा असफलता तोक्नेछन्। समयले मात्र यसको उत्तर दिनेछ।