काठमाडौँ । नेपालमा प्रतिनिधिसभा  र प्रदेश प्रतिनिधिका लागि निर्वाचन हुन करिब एक महिनामात्र बाँकी छ । यो चुनावको नतिजा के आउला ? अहिलेको सम्मको अवस्था हेर्ने हो भने चुनाव बहुदल आएपछि सत्तामा गएका पुराना राजनीतिक पार्टी नेपाली कांग्रेस, एमाले, माओवादीको विपक्षमा लहर बढ्दै गएको छ । 

यो चुनावमा स्पष्ट रुपमा राजनीतिक पार्टीको विगतको कार्यसम्पादनबाट आमनागरिक सन्तुष्ट छैनन् भन्ने देखाएको छ । सामाजिक सञ्जालहरूमा सत्तामा गएर पनि सुशासन दिन नसकेका राजनीतिक पार्टीप्रति व्यापक गुनासा देखिएका छन् । आम सर्वसाधारण मतदाता विकल्पको खोजीमा छन् । तर, भरपर्दो विकल्प भने अझै आइसकेको छैन । 

चुनावअघि अझै केही चुनावी मुद्दा अगाडि आउने छन् । कुनै सुनामी आउन पनि सक्छ । अहिले नै नेपाली कांग्रेस सभापति तथा प्रधानमन्त्री शेरबहादुर देउवा पत्नी आरजु देउवाले डडेलधुरामा दिएको मन्तव्य विवादस्पद भएको छ । 

पूर्वप्रधानमन्त्री माधवकुमार नेपालले निःशुल्क विदेश पठाइदिने आश्वासनले सामाजिक सञ्जाल तातेको छ । यसले आउने दिनमा अझै केही मुद्दाहरु आउन देखिन्छ । जसले पुराना राजनीतिक पार्टीको लोकप्रियता अझ घटाउन सक्छ । यस्ता संस्कार लिएका राजनीतिक पार्टीलाई कसरी भोट दिने ? बोल्दा यति पनि हेक्का नभएका नेतालाई कसरी स्वीकार्ने भन्ने दृष्टिकोण मजबुत हुँदैछ । राजनीतिक पार्टीले आम जनताको हुर्मत लिएका छन् । पार्टीभित्रै कुनै प्रजातान्त्रिक संस्कार छैन । त्यही भएर विकल्प खोजिएको हो ।

राजनीतिक पार्टीको घट्दो लोकप्रियतालाई सञ्चारकर्मीबाट राजनीतिमा आएका रवि लामिछानेको पार्टी राष्ट्रिय स्वतन्त्र पार्टीले कति आफ्नो पक्षमा ल्याउन सक्छ यो स्पष्ट छैन । विदेशमा गएका नेपालीले पाएको पीडा, गाउँघरका जनताका समस्या उठाएर रवि चर्चित भएका हुन् ।   

यस पटकको निर्वाचनमा केही फरक नतिजाहरू आए भने अन्यथा मान्नु पर्दैन् । स्थानीय तहको निर्वाचनमा काठमाडौँमा बालेन शाहले जसरी अप्रत्यासित जीत निकाले नयाँ अनुहारले त्यस्तै अप्रत्यासित जीत निकालेमा पनि अन्यथा हुने छैन् । यस पटक अलोकप्रिय वन्दै गएका सत्तामा गइसकेका राजनीतिक पार्टी भोटमा खुम्चिने भने पक्का छ । नेपालको राजनीतिमा केही न केही उथलपुथल भने देखिने अनुमान गरिएको छ ।