१ करोड ०४ लाख ३० हजार ४३९ मत गनियो, एकीकृत समाजवादीलाई राष्ट्रिय दल बन्न सकस

मंसिर ४ गते भएको प्रतिनिधि सभाको निर्वाचनमा समानुपातिक प्रणाली अन्तर्गत भएको मतगणना लगभग सकिएको छ।अब विभिन्न कारणले रोकिएको ठाउँका मतगणना मात्रै बाँकी रहेको निर्वाचन आयोगले जनाएको छ।

जसमा माधव नेपाल नेतृत्वको नेकपा एकीकृत समाजवादीले तोकिएको थ्रेसहोल्ड पुरा नगर्ने देखिएको छ। आवश्यक हुने मतको संख्या बढ्दै जाने तर पाउने भोट भने त्यसको तुलनामा नआइरहेकाले पार्टी केही हजार मतको अन्तरले समानुपातिकमा सिट पाउन र राष्ट्रिय पार्टीको मान्यता पाउनबाट चुक्ने देखिएको छ।

हालसम्मको विवरणअनुसार नेकपा (एमाले)ले सबैभन्दा बढी २७ लाख ९१ हजार ७३४ अर्थात २६.७६ प्रतिशत मत पाएको छ। यस्तै प्रत्यक्षतर्फ सबैभन्दा बढी सिट जितेको नेपाली कांग्रेसले २६ लाख ६६ हजार २६२ अर्थात २५.५३ प्रतिशत मत पाएको छ।

तेस्रोमा रहेको नेकपा (माओवादी केन्द्र)ले ११ लाख ६२ हजार १२४ अर्थात मत अर्थात ११.१५ प्रतिशत मत प्राप्त गरेको छ।

 यस्तै राष्ट्रिय स्वतन्त्र पार्टीले ११ लाख २४ हजार ५५७ अर्थात १०.७९ प्रतिशत मत पाएको छ। राष्ट्रिय प्रजातन्त्र पार्टीले ५ लाख ८६ हजार ६५९ अर्थात ५.६३ प्रतिशत मत पाएको छ।

जनता समाजवादी पार्टीले ४ लाख २० हजार ९४६ अर्थात ४.०४ प्रतिशत मत पाएको छ।

यस्तै सिके राउत नेतृत्वको जनमत पार्टीले ३ लाख ९४ हजार५२३ अर्थात ३.७९ प्रतिशत मत पाएर राष्ट्रिय पार्टी बनेको छ।

कूल खसेको सदर मतको तीन प्रतिशतभन्दा बढी मत पाउने राजनीतिक दलले राष्ट्रिय दलको मान्यता पाउने कानुनी प्रावधान छ। 

यता नेकपा (एकीकृत समाजवादी)ले हालसम्म २ लाख ९४ हजार ३६२ अर्थात २.८२ प्रतिशत मत पाएको छ।